Иберлиска река, недопрена македонска убавина
Ја среќаваме под различни имиња како Иберлиска, Челевечка, Јуручка или П’гавица. Но таа е една единствена – девет километри долгата лева притока на Вардар, која во горниот тек има кристално чиста и питка вода, а во долниот тек е исклучиво загадена и деоксидирана поради човечката негрижа. И покрај тоа, во неа се уште егзистираат некои видови риби и слатководен рак. А движењето по нејзиниот тек е едно исклучително доживување, со прекрасен пејсаж прошаран со шуми, ливади и пасишта, меѓу кои е и раритетната платанова шума. ДОМА преку серија фотографии ви доловува само мал дел од оваа природна убавина.
Иберлиска река е лева притока на Вардар која во нашата најголема река се влева на почетокот на Демиркаписката клисура. Долга е околу девет километри, а нејзиното сливно подрачје опфаќа територија од 34,15 квадратни километри.
Според кажувањата на локалните жители туристистичките работници од Демир Капија веќе започнале тука да организираат еднодневни екскурзии за своите гости. Можеби е тоа прв сигнал дека е потребно да се направи ревалоризација на вредностите на овој предел и негова заштита согласно новата законска регулатива, со што би се уредил начинот на однесување.
Пред да биде доцна.
Содржината е изработена од Институтот за комуникациски студии.
Фотографија и текст: Дарко Андоновски
