Уште при самото доаѓање во ски-центарот Попова Шапка посетителите се соочуваат со проблемот за паркирање на нивните возила. Хаосот со паркирањето на автомобилите се провлекува со години, а посетителите се принудени, во екот на сезоната и за викендите, автомобилите да ги оставаат покрај патот и да пешачат, неретко и по 3-4 километри.

Од крајот на седумдесетите години од минатиот век тука не е направена ниту една суштинска инвестиција. Центарот работи со дотраена инфраструктура, која често пати има дефекти, а поради тоа и застои во работата. Единствената инвестиција на Попова Шапка од осамостојувањето па до денес е новата жичница – шестосед, која е пуштена во употреба оваа година.

Купиштата ѓубре на самиот влез во центарот се редовна појава, како во летните, така и во зимските месеци. ЈКП од Тетово, поради недостиг на механизација, во текот на зимските месеци сметот го собира два пати неделно, а во текот на летниот период само еднаш.

Ако се изземе новата шестоседа жичница пуштена во употреба оваа година, целата останата инфраструктура во скијачкиот центар Попова Шапка е стара повеќе од 40 години.

Напуштената жичница која сега е заробена од дивоизградените куќи е своевиден споменик на времињата кога на Попова Шапка се инвестирало во скијачка инфраструктура, а не во урбан хаос.

Постоечката улична инфраструктура во викенд населбата станува претесна за да одговори на рапидното зголемување на бројот на возила кои тука циркулираат, па застоите во движењето на возилата и неможноста за разминување се редовна слика, дури и во периодите вон главната сезона.

Попова Шапка, нашиот најстар и најпознат зимски скијачки центар, од симбол на скијањето во Македонија, постепено прераснува во симбол на насилство врз природата.

Наместо да добива лик на современ скијачки центар, Попова Шапка се повеќе наликува на заостаната рурална населба.

Најмалку 90-тина дивоградби на Попова Шапка кои се на подрачје за кое нема детален урбанистички план ќе можат да се се легализираат со новото законско решение за легализација на дивоградбите кое неодамна го претстави Владата.

Изградбата на бесправни објекти се шири неконтролирано и на сите страни.

Се гради и во поширокото подрачје на ски центарот, којшто влегува во територија која неодмна беше прогласена за национален парк. Неизбежен впечаток е дека ски-центарот е опколен од дивоградби и дека наместо соодветна урбанизација тука владее беззаконие.

Урбанистичкиот хаос, нехигиената, неинвестирањето во нова опрема, се причина од година во година бројот на посетители на нашиот најголем зимски центар да се намалува, и се повеќе, да се ориентираат кон дестинациите во соседните земји.