Угинати животни, пластика и други отпадоци можат да се забележат во дворот на поранешниот Дом за штитеници „Ранка Милановиќ“ во Скопје.

Очигледно е дека никој не се грижи за чистење на дворот на некогашната установа во којшто некогаш беа сместени деца со социјални проблеми. Поради негрижата на надлежните, но пред се‘ поради несовесните граѓани коишто тука фрлаат отпад местото е претворено во мала депонија сред главниот град.

Уште постравични се сцените кај скопско Визбегово. Во близина на обработливо земјиште таму се наоѓаат огромни купови од различен отпад. Никој не мери какви се можните штетни влијание врз храната којашто се одгледува на нивите коишто се наоѓаат до депонијата.

Со нашиот објектив „уловивме“ со каква леснотија се одлага отпад на дивата депонија кај Визбегово.

Никој не го контролира овој терен освен кучињата и млади лица кои од немајкаде проверуваат дали во отпадот можат да најдат нешто корисно.

Голем број неедуцирани македонски граѓани сметаат дека најидеалните места за одлагање шут и отпад се наоѓаат во близина на речните корита. Тоа најдобро го покажува оваа сцена во близина на реката Лепенец, каде што можат да се видат дури и стари парчиња мебел.

Слични сцени можат да се забележат и по течението на реката Вардар во близина на Велес.

Жално е што како место за одлагање шут и отпад се гледа и коритото на реката Радика. Очигледно е дека дел од жителите на блиското село Косоврасти и од овој крај не се премногу загрижени за загадувањето на една од најубавите реки во Македонија.

Убавина претворена во депонија на автомобилски гуми може да се забележи на патот Дебар-Струга.

Итно е потребно да се обезбеди едукација на населението, но и да се обезбедат соодветни локации за одлагање отпад. Во спротивно ваквите сцени од селото Броштица, во Центар Жупа кадешто депонијата се наоѓа веднаш до првите куќи ќе продолжат да ја нагрдуваат и да ја загадуваат природната средина.